ជប៉ុន៖ បេក្ខភាពនានាសម្រាប់ការបន្តតំណែងនាយករដ្ឋមន្រ្តីជប៉ុន បានចាប់ផ្តើមយុទ្ធនាការឃោសនាស្វែងរកការគាំទ្ររបស់ខ្លួនជាផ្លូវការហើយនៅថ្ងៃសុក្រ ទី១៧ ខែកញ្ញាចុងសប្តាហ៍នេះ ខណៈដែលរដ្ឋមន្ត្រីកិច្ចការវ៉ាក់សាំងជប៉ុន លោក Taro Kono ត្រូវបានគេរំពឹងថានឹងក្លាយជាបេក្ខភាពដែលមានភាគរយខ្ពស់ជាងគេក្នុងការបន្តតំណែងជានាយករដ្ឋមន្រ្តីជប៉ុន ជំនួសលោក Yoshihide Suga ដែលបានប្រកាសលាលែងពីការដឹកនាំនៅចុងខែកញ្ញានេះ។

ការប្រកួតប្រជែងសម្រាប់ការដឹកនាំគណបក្សប្រជាធិបតេយ្យសេរី បានកក្រើកឡើងដោយមិនមានការរំពឹងទុក ក្រោយពេលដែលលោក Suga ភ្លាមៗស្រាប់តែបានប្រកាសថា លោកនឹងលាលែងពីតំណែងជានាយករដ្ឋមន្ត្រីជប៉ុន ក្រោយពេលដែលលោកទើបតែបានចូលកាន់តំណែងបន្តពីលោកនាយករដ្ឋមន្រ្តី Shinzo Abe រយៈពេលប្រមាណជាងមួយឆ្នាំប៉ុណ្ណោះ។

អ្នកឈ្នះនៃការបោះឆ្នោតជ្រើសរើសថ្នាក់ដឹកនាំគណបក្ស LDP ជប៉ុនដែលនឹងប្រព្រឹត្តទៅនៅថ្ងៃទី២៩ ខែកញ្ញានេះ នឹងក្លាយជានាយករដ្ឋមន្រ្តីផ្លូវការថ្មីនៃរដ្ឋាភិបាលជប៉ុន ដោយផ្អែកលើសំឡេងភាគច្រើនរបស់គណបក្សនៅក្នុងសភាជាន់ទាបរបស់ជប៉ុន។ ដោយឡែក ពាក់ព័ន្ធនឹងការលាលែងពីតំណែងរបស់លោក Suga នេះដែរ ត្រូវបានគេមើលឃើញថាមកពីវិបត្តិកូវីដ-១៩ ដែលបានរាតត្បាត និងវាយប្រហារមកលើប្រទេសជប៉ុន ខណៈអ្នក​បន្តដំណែងនឹងត្រូវដោះស្រាយបញ្ហានេះ មុននឹងឈានមកដល់នូវការបោះឆ្នោតថ្នាក់ជាតិនាខែវិច្ឆិកាខាងមុខនេះ។ 

កន្លងមកបេក្ខភាពដែលគេបានឃើញថាមានការប្រកួតប្រជែងខ្លាំងក្នុងការដឹកនាំបន្តនូវគណបក្ស LDP មានបួនរូបរួមមាន រដ្ឋមន្រ្តីកិច្ចការវ៉ាក់សាំង លោក Taro Kono, អតីតរដ្ឋមន្រ្តីការបរទេស លោក Fumio Kishida, លោកស្រី Sanae Takaichi ដែលមានការគាំទ្រដោយលោក Abe និងរដ្ឋមន្រ្តីកិច្ចការផ្ទៃក្នុង និងទំនាក់ទំនង លោកស្រី Seiko Noda៕

លោកស្រី Sanae Takaichi
លោកស្រី Seiko Noda